أزيكم، أنا كتاكيتو

أم لبنوتة جميلة شقية. بكتب قصص للأطفال. بقدم مقالات تربوية عن أدب الأطفال.

اسمي كرستين عياد، أم لبنوتة جميلة شقية. زي أي أم بحاول أبذل مجهود عشان أنتقي كتب وقصص جيدة لبنتي، من حيث المحتوى المكتوب والمرسوم. الحقيقة المكتبة العربية والأجنبية مليانيين كتب. لكن بالرغم من كدة مازال في قصور كبير في مناطق معينة، وحتى المناطق اللي اتغطت، فيها منها ممكن يتقدم تاني بشكل وبرؤية أفضل. واجهتني مشاكل في إني ألاقي بعض نوعيات في قصص الأطفال، فحاولت أحل المشاكل اللي واجهتني بنفسي. وبدأت أقرأ عن أدب الطفل والتحقت بورش عن كتابة قصص الأطفال. وبدأت أكتب بالفعل. هنا هقدم كل اللي هقوم بانتاجه من قصص للأطفال.

كمان هقدم مقالات تربوية في مجال قصص وأدب الأطفال، زي ازاي نختار قصة لأولادنا، ويعني ايه أصلا قصة، ازاي نحكي حكاية...إلى آخره.

أنا خريجة هندسة طبية جامعة حلوان، درست دبلوم الآثار المصرية بكلية آثار جامعة القاهرة، وحاليا بحضر ماجستير في الآثار المصرية بجامعة الفيوم.

تابعوني...

كتاكيتو.