المقال ده مهم جدا من اليونيسف بيحاول يوضح ازاي تشرح الأزمة بتاعة كورونا فيروس للأطفال. انا حاولت أترجمه باختصار للعربي للي حابب. وهيكون رابط المقال الأصلي موجود في اخر الترجمة.
ابدأ بفتح اسئلة عامة عن الموضوع مع طفلك. حاول تفهم هو مستوعب قد ايه من الموضوع. لو لقيته مش مدرك المشكلة أساسا متحاولش تشغله بالمشكلة، حاول بس تكلمه عن النظافة العامة والاهتمام بيها. لو هو خايف أو قلقان احترم مشاعره ومتستقلش بأي تحفظ عنده. وحسسه ان مشاعر الخوف دي طبيعية.
لازم تكون صادق مع ابنك او بنتك وتوصلهم معلومات حقيقية. من حقهم يعرفوا الحقيقة. لكن حاول تختار لغة مناسبة ليهم. وحاول تكون فاهم كويس درجة قلقهم عشان متقلقهمش زيادة. ولو في سؤال معرفتش تجاوبه بلاش تألف من دماغك. ادخل على موقع الunicef و ال WHO وحاول تفهم وتجاوب اجابة سليمة.
حاول تشرحلهم ببساطة ازاي يحموا نفسهم. من غير ما ترعبهم. ازاي لما يكحوا يستخدموا الكوع مش كف الايد. وبلاش تجمعات، وهلم جرى. وتشرحلهم الأعراض وانهم لو حسوا بأي حاجة، ده في حالة لو الطفل كبير كفاية، يتكلم على طول.
لو انتوا بتتفرجوا على الأخبار كتير والطفل معاكم. خلوا بالكم ان الاطفال مش بتميز احيانا ما بين الشاشة والحقيقة وممكن تحس انها في خطر حقيقي. حاولوا تخرجوا أطفالكم من المود ده بأي طريقة، العبوا ومارسوا الروتين اليومي بتاعكم عادي. لو المنطقة بتاعتكم فيها أزمة كبيرة مع الفيروس، طمن ابنك ان الناس مش بتمرض جامد وناس كتير بتخف، والدكاترة والمستشفيات بيحاولوا يساعدوا الناس جامد انها تبقى كويسة. وابنك لا قدر الله تعب ومتضطرين تدخلوا مستشفى طمنه من المستشفى.
حاول تطمن من ابنك ان معندوش أي ميول أو أفكار لها أبعاد عنصرية عن الفيروس. بمعنى انه مرتبط بجنس معين، ولو شفنا حد بالشكل الفلاني نتريق عليه انه شايل الفيروس وكدة.
اتكلم عن الجزء الايجابي في الموضوع انك تحاول توضح للأطفال دور العلماء والأطباء في انحصار المرض.
لازم انت كمان تحاول تهدي نفسك وتقلل من مخاوفك لأن الإطفال بيدركوا أحاسيسنا.
قبل ما تقفل الحوار معاهم اطمن مشاعرهم وصلت لفين. من طريقة تنفسهم ومن حدة صوتهم. ولو حسيت انهم لسة قلقانين وضح لهم قد ايه انت مهتم تسمعهم تاني وتتكلموا مع بعض في مرة تانية.
وزي ما وعدتكم، ده رابط المقال الأصلي:
https://www.unicef.org/coronavirus/how-talk-your-child-about-coronavirus-covid-19